عندي مشكلة شاركوني في حلها

من أكثر المسلسلات اللي حبيتها وبشوفها كثير على اليوتيوب وبعيدها بدون ملل

مسلسل قصة حب

ولما بشوف رحمة ( الفنانة بسمة) أتذكر معلمتي

بصراحة عندي معلمة في المدرسة متشددة جدااااااا

ودائما لها قبول ولكلامها وزنه عند البنات

طبعا مش لأنهم مقتنعين

بس لأنها جميلة جداااااااا ومثقفة وأنيقة

طبعا ما بظلمها مو متطرفة بالعكس التطرف اللي فيه قتل وتدمير بتكرهه وتقول لنا دائما هذا مو من الدين هذا إساءة للدين

بس بنفس الوقت كل شي عندها حرررررام

خاصة الأشياء المعروضة بالمسلسل

حتى صاحباتي بس تتكلم على طول بحسهم بيذوبوا ويطبقو كلامها

نفسي أقنعها تشوف المسلسل بس اشلون؟؟؟؟

وكيف أفاتحها

مرة رحت لها وأنا خلاص ناوية أقول بس شفتها ووقفت قدامها ارتبكت

حطت يدها على كتفي وقالت لي / فيه شي يا مرام؟؟

وأنا بكل سذاجة قلت لا خلاص مافيه شي يا أبله!!!

ابتسمت وراحت وأنا مقهورررررررة وزميلاتي يضحكون علي ويتريقون

قالوا شكلك بس وقفتيها عشان تعيشين لحظة تأمل!!!!!!!!!!!

قولوا لي وش الحل في نظركم؟؟

رأيي إنك تحضري نفسك نفسيا جداااا ,, وإقتناعك بالمسلسل وأقكاره هي نقطة إنطلاقك للحوار معها ,, وكمان ثقتك في أفكار المسلسل ...توكلي على الله cheers

والله انا اشوف اذا كانت معلمتك من النوع المتزمت و تشوف كل حاجة حرام فمن الافضل ماتقولين لها شي .. لكن اذا كانت نوعا ما متفتحة فبامكانك تتكلمين عن المسلسل و تقولين انه كان يركز على المدرسة بشكل عام و طبيعة العلاقة بين المعلم و تلامذته و ان المسلسل هادف و يناقش القضية بصورة جدا رائعة بدون مبالغة او ابتذال .. و بعد كذا بامكانك تبلغغينها عن المسلسل

بس انا راى لو كانت متذمتة من الافضل انا وشيفة كل شى حرام المفروض ماتقلها تشوف المسلسل لانا حسب قنعتا مش راح توفق على مشاهد الرومانسية الى بالمسلسل وراى انا منننزلى عن اراك واعتمدى على الحوار الهادى معها وقولى لها انك لاتفعلى شئ غير مقتنعة بة

ممكن تطرحي معها أفكار من اللي ناقشها المسلسل ,, وتوضحي لها إنك شوفتيها في عمل درامي راقي جدا , وانصحيها بمتابعته

عاشقة الحضارة كتب:: رأيي إنك تحضري نفسك نفسيا جداااا ,, وإقتناعك بالمسلسل وأقكاره هي نقطة إنطلاقك للحوار معها ,, وكمان ثقتك في أفكار المسلسل ...توكلي على الله

صدقيني المرة اللي فاتت كنت مستعدة نفسيا

وحتى كنت أقول لنفسي حتى لو زعلت مني مو مشكلة المهم أقول اللي عندي ويمكن تقتنع تشوف المسلسل

وجهزت الكلام اللي حقوله لها من الليل ورتبت أفكاري

وبس وقفت قدامها حسيت إني موعارفة كيف أبدأ Embarassed

هي كمان ذوق وأخلاق فتحرج الواحد يحس قدامها بالعجز

فهمتيني؟!

apollo كتب:: والله انا اشوف اذا كانت معلمتك من النوع المتزمت و تشوف كل حاجة حرام فمن الافضل ماتقولين لها شي .. لكن اذا كانت نوعا ما متفتحة فبامكانك تتكلمين عن المسلسل و تقولين انه كان يركز على المدرسة بشكل عام و طبيعة العلاقة بين المعلم و تلامذته و ان المسلسل هادف و يناقش القضية بصورة جدا رائعة بدون مبالغة او ابتذال .. و بعد كذا بامكانك تبلغغينها عن المسلسل

يعني أيه النوع المتزمت؟ويعني أيه متفتح؟

عشان أعرف إذا كانت كذا والا كذا

إحنا حاولنا مرة في حصة انتظار نفتح معاها الموضوع بس هيه ما عطتنا وجه

كانت تصحح دفاتر جايبتها معها

وجلسنا نتحدى مين اللي حتبدأ

وفعلا وحدة من صاحباتي قالت لها أبله ممكن سؤال؟

طالعت فيها وقالت تفضلي

قالت البنت بتشوفي مسلسلات يا أبله( شوفو غباااااااء السؤال)

قامت الأبله رجعت لدفاترها وقالت ببرود لا

ولا حتى سألت ليه

بعدين قالت شوفو لكم حاجة تنفعكم أحسن من المسلسلات أو إذا نفتح مع بعض موضوع اختاروا موضوع جيد

طبعا سكتنا وهيه كانت مشغولة لحد ما انتهت الحصة

كنان الشمالى كتب:: بس انا راى لو كانت متذمتة من الافضل انا وشيفة كل شى حرام المفروض ماتقلها تشوف المسلسل لانا حسب قنعتا مش راح توفق على مشاهد الرومانسية الى بالمسلسل وراى انا منننزلى عن اراك واعتمدى على الحوار الهادى معها وقولى لها انك لاتفعلى شئ غير مقتنعة بة

ما تكسرش مجاديفي

أنا مصرة أبلغها بالمسلسل وأطلب منها تشوفه

بس مش عارفة الطريقة المناسبة

عاشقة الحضارة كتب:: ممكن تطرحي معها أفكار من اللي ناقشها المسلسل ,, وتوضحي لها إنك شوفتيها في عمل درامي راقي جدا , وانصحيها بمتابعته

ممكن أحاول في حصة انتظار

هيه أبله عبير مش صعبة

يعني دائما تحب تفتح معانا مواضيع وتناقشنا فيها

بس ما عمرنا فتحنا معاها موضوع مسلسل وقلنا لها شوفيه

يعني أنا لو أبدأبس كل اللي بعد كذا سهل

بس كيف أبدأ

مشكورة عاشقة الحضارة على اهتمامك

ادعي لي

بقولكم معلومة عنها غريبة كمان

هي من النوع اللي دائما بتقول لنا عبري عن نفسك بثقة

الشيء اللي إنتي مقتنعة فيه المفروض لو سمعه منك العالم كله ما يهمك لأنك واثقة إنه صح

ودائما بتقول لا تسمحي لأحد يصادر رأيك ويثنيك عن مبادئك

وعشان كذا دائما بتعبر عن رأيها وتناقشنا بالمنطق والدليل زي ماهيه بتقول

وكثير بنات بيقتنعو بكلامها وبيحاولو يقلدوها

بس ماعمرها رفعت صوتها علينا حتى لو زعلانة ممكن تتكلم بحزم بس برضه بذوق وأخلاق

شخصية رزينة وجذابة والكل في المدرسة بيحبها حتى أنا

صح ممكن بالدرجة الأولى كثير بيحبوها عشان جمالها وأنا قتها بس هيه كمان أخلاق

عشان كذا حاسة إنه هيه صعبة ومش صعبة في نفس الوقت

شي غريب صح

المزعج فيها بس إنه كل شي حرام

يعني الأغاني كلها حرام حتى الوطنية

الحجاب لازم مواصفات معينة

وحاجات زي كذا

حلولي تتكلمي معاها
وخبرينا باللي يصير معك

اوكيه من خلال كلامك و من خلال خبرتي كمعلمة انصحك انه ماتفتحين معها موضوع المسلسل ابدا لاني اتوقع لو قلت كلمة مسلسل يمكن تزعل منك و مو بعيدة كمان تنهرك لان هذا النوع من الناس صعب تخلينه يغير منطقه و مو معناتها انها محترمة و ذوق انها راح تسمح لك تفتحين معها مثل هذي المواضيع فاذا كانت مثل ماتقولين انه الاغاني عندها حرام و كل حاجة حرام فما راح تهتم للموضوع و يمكن حتى ماتشوف التلفزيون نهائيا من اصله و مو بعيدة انه تأخذ عنك فكرة انك بنت بايخة و هايفة و عقلك صغير ... المهم اعتبري الكلام اللي قلته لك نصيحة من وحدة عندها خبرة بهذي الامور فما تتسرعي و تفتحي الموضوع معاها الا في حالة وحدة انه ( ممكن و هي تكلمكم عن الحجاب و النقاب تربطين هالموضوع بالمسلسل اللي شفتيه و كيف انهم وضحوا انه الحجاب هو حماية للمراة ولا يعيق ان تكون متعلمة و مثقفة في نفس الوقت) على فكرة انا تابعت المسلسل لكن لو سألتني اي طالبة عنه ماراح اسمح لها تناقشني فيه لانه الانظمة تمنع الحديث في مثل هذه المور بين المعلمة و طالباتها

عاشقة الحضارة كتب:: حلولي تتكلمي معاها
وخبرينا باللي يصير معك

إن شاء الله حأحاول

بس إش رأيك فكرت اليوم إني أكتب لها رسالة على الإيميل مثلا

هل بيكون أحسن من المواجهة؟

أبله عبير بتفتح الإنترنت كثير وبعض زميلاتي يراسلوها على الإيميل بس أنا ماجربت

apollo كتب:: اوكيه من خلال كلامك و من خلال خبرتي كمعلمة انصحك انه ماتفتحين معها موضوع المسلسل ابدا لاني اتوقع لو قلت كلمة مسلسل يمكن تزعل منك و مو بعيدة كمان تنهرك لان هذا النوع من الناس صعب تخلينه يغير منطقه و مو معناتها انها محترمة و ذوق انها راح تسمح لك تفتحين معها مثل هذي المواضيع فاذا كانت مثل ماتقولين انه الاغاني عندها حرام و كل حاجة حرام فما راح تهتم للموضوع و يمكن حتى ماتشوف التلفزيون نهائيا من اصله و مو بعيدة انه تأخذ عنك فكرة انك بنت بايخة و هايفة و عقلك صغير ... المهم اعتبري الكلام اللي قلته لك نصيحة من وحدة عندها خبرة بهذي الامور فما تتسرعي و تفتحي الموضوع معاها الا في حالة وحدة انه ( ممكن و هي تكلمكم عن الحجاب و النقاب تربطين هالموضوع بالمسلسل اللي شفتيه و كيف انهم وضحوا انه الحجاب هو حماية للمراة ولا يعيق ان تكون متعلمة و مثقفة في نفس الوقت) على فكرة انا تابعت المسلسل لكن لو سألتني اي طالبة عنه ماراح اسمح لها تناقشني فيه لانه الانظمة تمنع الحديث في مثل هذه المور بين المعلمة و طالباتها

أولا يشرفني أتعرف عليكي يا أستاذة

وثانيا واااااو خوفتيني

طبعا كله إلا الأنظمة لأنه عندنا مديرة ياساااااااتر

الأنظمة عندها كتاب منزل من السما

بس على فكرة إنتي معلمة في السعودية والا برا السعودية لأنه الأنظمة تختلف وما عمرهم قالو لنا عن نظام زي كذا

أعتقد إنها تشوف التلفزيون لأنها اليوم كلمتنا عن اللي يصير في سوريا وقالت لنا إنتو ما تتابعون الجزيرة وقنوات الأخبار وتشوفون اللي قاعد يصير لأهلنا في سوريا

بصراحة كلمتنا كلام مؤثر جدا جدا وفي النهاية بكت حتى ماقدرت تكمل كلامها وطلعت برا الفصل شويه ورجعت

وأنا على طول تذكرت المبدع جمال سليمان لما كتب أبيات نزار قباني لرحمة اللي فيها بعض النساء وجوههن جميلة وتصير أجمل عندما يبكينا!!!!

يعني أنا في وادي وهيه كانت في وادي ثاني

على فكرة أبله عبير ما تحب نزار قباني

تقول ربنا أعطاه موهبة عظيمة بس استخدمها غالبا غلط

ولما ناقشناها وقلنا لها فيه أبيات حلوة قالها قالت أنا قلت غالبا شعره غلط مو كل شعره

أما لو كلمتها فحتى لو زعلت ماأتوقع راح تغلط عليه ولاتنهرني

لأنه ماعمرها سوتها حتى مع البنات اللي دايما يضايقونها

إذا زعلت ممكن تمشي وتخليني أو ما ترد عليه أو أي تصرف ما يجرحني بشكل مزعج

كذا دائما تعاملها معنا

بس قولي لي رأيك في فكرة رسالة الإيميل

فكرة رسالة الإيميل حلوة جدا ....خصوصا إنها لا تتطلب نفس القدر من الشجاعة الموجودة في موقف المواجهة Idea

حبيبتي انا معلمة في السعودية و حابة بس اوضح لك انه فيه امور و انظمة لاتعلم عنها الطالبات فمثلا ممنوع على المعلمة انه تقبل ورد من الطالبات و ايضا ينبهون علينا مانتكلم في امور التلفزيون و ما شابه ذلك مع الطالبات ... لكن طبعا فيه معلمات مايلتزمون بها الامور مما يعرضها في بعض الاحيان للتحقيق .. على كل انا من غير ما اشوفك اقدر احكم عليك و اقول انه انت مبين كثير متسرعة و مندفعة بقوة تجاه معلمتك بحكم سنك و بحكم محبتك لها.. نصيحتي انه تحاولين تظبطين نفسك و ما تخسرين معلمتك .. الحين بالنسبة للايميل فكرته حلوة لكن من البداية احس صعب تكلمين المعلمة بها الموضوع .. بعدين ياليت تو ضحين لنا هي بايش تراسل البنات في الايميل .. اكيد امور دراسية او نصائح دينية و مااتوقع انه فيه اكثر من كذا و بالمناسبة عندنا معلمة تقريبا ينطبق عليها نفس المواصفات اللي قلتيها في معلمتك و مع ذلك نكون حذرين في التعامل معها لانها ماتتقبل ان احنا نتكلم في التلفزيون و الشعر و مالى ذلك ( مثلا قبل يومين انتقدت شنطتي لانه فيها صورة بنت - على اعتبار انها صورة روحية) على كل انصحك انه تحاولين انك تجدين ارضية مشتركة بينك و بين معلمتك في البداية مثل الامور الدينية بمعنى انه لازم تبداين علاقتك بها عن طريق اشياء تهم المعلمة فاذا تطورت الامور و حسيت انه انت ماعاد متوترة و انه معلمتك تثق في وجهة نظرك من هنا تقدرين تكلمينها عن المسلسل مع الاخذ في الاعتبار انه انت ماتتكلمي عن المسلسل بما يوحي انه للتسلسة و زيه زي اي مسلسل ثاني .. لازم توضحين لها انه المسلسل يناسب توجهاتها و يبين اهمية الحجاب لانه بها الحالة اعتقد راح تتناقش معاك و مين يدري يمكن تشاهده .. اما اذا كلمتيها من البداية عن المسلسل من اول ايميل صدقيني رسالتك راح تحذف

ماعليش انا كثرت عليك بالكلام لكن اتمنى اني افدتك

أهلين أبله apollo

أولا أشكرك لاهتمامك وردك

وثانيا أنا قريت ردك من العصر وكنت برد من وقتها بس ماما بتفصل النت أحيانا عشان نذاكر

وهالحين بالواسطة فتحته لأنه الوقت متأخر ومو جايني نوم

المهم طبعا أنا أعرف إنه فيه أنظمة وممنوعات

وإذا على الهدايا والورد أعتقد أبله عبير أكثر وحدة في العالم تعاني من هالشي

بس هيه طبعا ما تقبل أي شي ومع كذا البنات عجيبااااات لأنهم ما يبطلوا هالشغلات

أما على الحذر في التعامل معها بالعكس هيه أبعد وحدة عن هالكلام يعني هيه ريلاكس وحبوبة وبتاخذ وتعطي في الكلام بأسلوب حلو

والشعر ما ترفضه لأنه هيه معلمة عربي بالعكس دائما يجي على لسانها أبيات حتى أبيات حب كمان وبتقولها وهيه تضحك لما نكون نتكلم عن أشياء زي كذا من اهتمامات البنات

وهيه بنفسها بتكتب أبيات حلوة وشاعرية وحزينة

زي مثلا عن غزة وعن الألم في الحياة وعن الحزن وأكيد هيه ما تقول لنا كل اللي بتكتبه

والتلفزيون قلت لك هيه تشوفه بدليل كلامها عن سوريا وقنوات الأخبار

والبنات اللي بيراسلوها على الإيميل يستشيروها في أشياء وأحيانا يحكو لها مشاكلهم حتى وحدة حكت لنا كيف ساعدتها بطريقة حلوة وتدخلت في مشكلتها وفعلا أنقذتها إلى درجة إنها راحت لبيتها عشان تقابل أمها

وطبعا فيه بنات أكيد بيستخدموه علشان يحكو لها مشاعرهم وحبهم لها

كذا أتوقع والا أنا ما فيه أحد قال لي

المهم كل هذا ما كسر الحاجز اللي في نفسي إني أقدر أقول لها تشوف المسلسل

وأنا حسيت من كلامك إن قصدك إني مندفعة تجاهها إني معجبة مثلا

طبعا لا صح أنا أحبها وهي تستاهل الإعجاب بس هذا أكثر شي أنا أكرهه وهيه كمان بتكرهه وتعاني منه جدا

أنا بس نفسي أبله عبير تشوف الحياة بمنظار ثاني وحاسة إنه هذا المسلسل بالذات اللي ممكن يعمل هالفرق

عشان كذا جالسة أفكر في أحسن طريقة أطلب منها إنه تشوفه بدون ما أنزل من نظرها ولا تزعل مني

وفي نفس الوقت تشووووووووف المسلسل

بكره حتدخل عندنا ريادة ويمكن أحاول أكلمها

شوفى مرام حبيبتى فى رأيى مثل هذه المدرسه وبتأثيرها القوى على من حولها انا من وجهة نظرى لا تتحدثى معها عن المسلسل لأنها راح تقنعك أنتى بعدم مشاهدة المسلسل لكن عموما انتى ممكن تطلبى منها مشاهدة المسلسل وأخبريها بأنه يقدم رساله نبيله عن القيم والبعد عن التطرف

Rehab-Admin كتب:: شوفى مرام حبيبتى فى رأيى مثل هذه المدرسه وبتأثيرها القوى على من حولها انا من وجهة نظرى لا تتحدثى معها عن المسلسل لأنها راح تقنعك أنتى بعدم مشاهدة المسلسل لكن عموما انتى ممكن تطلبى منها مشاهدة المسلسل وأخبريها بأنه يقدم رساله نبيله عن القيم والبعد عن التطرف

أهلين رحوبة

مشكورة على اهتمامك وردك

باركي لي قلت لها

اقري ردي اللي جاي

باركووووووووووووو لي تجرأت وقلت لأبله عبير عن المسلسل لما جتنا في حصة الريادة

طبعا كانت تسولف معانا في تنظيم الفصل واختيار أعضاء مجلس الفصل

بعدين سألتنا عن إجازتنا وفين رحنا وجينا وشو استفدنا

انا حسيتها رايقة وتضحك انتظرت لحد ما خف الكلام عن الإجازة

بعدين وقفت بكل شجاعة وقلت لها أبله ممكن نفتح معك موضوع ما يهمك بس يهمنا بشرط ما تزعلين مني

قالت لي تفضلي يا مرام اللي يهمكم يهمني

وأي شي منك مقبول لأنك بنت شاطرة ومحترمة ولو إن فيك (لسعة شقاوة) بس برضه حلوة منك (إحم إحم أنا كل ده)

الحين عرفتوا من وين جبت لسعة شقاوة هيه طبعا تقولها لي دايما

طبعا هيه تقول هالكلام وأنا أضرب أخماس في أسداس

بعدين قالت قولي يامرام ما بزعل منك

قلت لها المسلسلات ياأبله مو كلها سيئة

وأنا شفت مسلسل يناقش أفكار حلوة وكأنه مسلسل مسوينه هنا في السعودية

وبالعكس فيه أفكار إنتي بنفسك تعلمينا إياها

قالت طيب حلو إنكم تميزون بين الجيد والسيء وتتابعون الجيد

قلت لها بس أنا نفسي يا أبله تعرفين الأفكار اللي في المسلسل هذا بالذات ونتكلم فيها مع بعض

قالت ما عندي مانع تفضلوا اطرحوا أفكار المسلسل وأنا مستعدة أسمعكم

قلت لها ما ينفع لأنه مهما قلنا ما بنقدر نوصلها لك زي ما شفناها

ابتسمت وقالت يعني قصدك أشوفه؟!

قلت لها ليش لا ما دام مسلسل جيد

قالت لي إش اسمه؟

قلت لها قصة حب

قالت لي بنبرة استغراب خوفتني ( تركي؟)

قلت لها لا مصري

قالت إن شاء الله ما يكون شبه العشق الممنوع اللي أتوقع ناس منكم شافوه

قلت لا والله بعيد عنه تماما ولا فيه مجال للمقارنة

بالعكس مسلسل محترم وصاحبة القصة أصلا لابسة حجاب زي حجابنا

قالت لي طيب لو لقيت وقت بفكر في الموضوع

قلت لها تكفين يا أبله فعلا مسلسل مهم إنك تشوفيه

سألتني موجود على اليوتيوب؟

قلت لها إيه موجود

قالت لي متأكدة إنه مصري ومحترم وما فيه قلة أدب

ودق الجرس عشان الريادة انتهت ويدي على قلبي

قلت لها والله محترم (وشاركوني البنات في الكلام عنه)

من ضمن الكلام قالت وحدة من البنات أبله أصلا البطل في المسلسل اسمه جمال سليمان سوري ومعروف إنه مسلسلاته محترمة!!

قالت ماتفرق المهم ما يكون تركي!!!

بعدين قالت شي قنبلة كلنا تفاجأناااااااااا

قالت هذا اللي كان يمثل إنه صلاح الدين؟؟!!!!

كلنا استغربنا وقلنا إيه هو شفتيه يا أبله؟

قالت إيه المسلسل هذا شفته

وشالت أوراقها وجت بتطلع قلت لها أبله بتشوفينه

قالت إن شاء الله يا مرام)

بشوفه عشان أعرف معايير الجيد والسيء عندكم وأناقشكم فيه

وصرخنا أنا وزميلاتي صرخة فرح وانتصار

كلنا مومصدقين

والبنات والأبلات اللي مارين من عند فصلنا كانوا يطالعون لنا باستغراب

وبعضهم باحتقار لأنهم توقعوا إنه صرخنا لأن أبله عبير حتطلع من فصلنا

المهم هيه طلعت وهيه مبتسمة من صرختنا

تخيلو قمت سجدت شكر من كثر ما أنا فرحانة

يالله قولو لي رأيكم في البطلة مراااااااام

كنت فرحانة أكتب لكم هالخبر من أمس بس للأسف كان أربعاء وجونا ضيوووووف وكنت مشغولة معاهم على طول

وماما لما يكون فيه ضيوف ما تفتح النت

تحياااااااااااااااااتي للجميع وأنتظركم

:157

ألف مبروووووووووووووووووووووووووك ..وهل يخفى القمر !! ؟؟

عاشقة الحضارة

أهلين حبيبتي

كنت متأكدة إنه إنتي اللي حتشاركيني فرحتي

وفعلا زي ماقلتي أنا برضه قلت : وهل يخفى القمر؟؟!!

حتى أبله عبير طلعت عارفة المبدع جمال سليمان

عشان كذا كنت مبسوطة أكثر

تحيااااتي لك يا عسولة

ليش احنا وين رحنا ..هههههههههههههه

على كل الف مبروك و بكل صراحة تفاجأت من ردة فعل معلمتك

الظاهر اني حسبتها خطأ

العفو أبله apollo

أنا قصدي بس إني توقعت تكون عاشقة الحضارة أول وحدة بتهتم بالموضوع وتشاركني فرحتي

وإنتي من بداية الموضوع مو مقصرة

بالعكس استفدت من كلامك وحسيت باهتمامك

وأنا أشكرك جدا على هالإهتمام

وما تصدقين كيف أنا مشتااااااقة لليوم اللي حتخلص فيه أبله عبير متابعة المسلسل ونتكلم معاها عنه

عارفة من الأشياء الحلوة في أبله عبير إنها إنسانة راقية ومنصفة مهما كانت وجهة نظرها الشخصية

عشان كذا أنا جدا متفائلة ويارب تجي العواقب سليمة

تحياتي لك وتشرفت بوجودك

مساءكم ورد يا أصدقاء أحسن نجم بالدنيا

أنا فرحانة أقول لكم آخر التطورات

اليوم بالصدفة قابلت أبله عبير في وسط الدرج

ابتسمت لي فقلت لها كيفك يا أبله

صافحتني وقالت الحمد لله إنتي كيفك يامرام وكيف ماما؟

(طبعا تسألني لأني إنسانة مهمة إحم إحم

) عندي مشكلة شاركوني في حلها 929492

قلت لها الحمد لله بخير

أبله بدأتي تشوفين المسلسل؟

قالت إيه بدأت

قلت لها فين وصلتي ؟ قالت الحلقة 9 لأني كنت فاضية خميس وجمعة

قلت لها إش رايك؟ قالت لسا مالي رأي لحد ما أخلص كل الحلقات

طبعا الكلام كان على السريع وهيه شكلها مستعجلة لأنها طالعة حصة انتظار

ياحظ اللي راحت لهم lol!

المهم حبيت أقول لكم وين وصل الموضوع

يارب تكمل فرحتي

ليتني بعدين أقدر أسجل حلقة النقاش وأنزلها لكم

بس فيديو طبعا geek

ههههههههههههه

علشان تغتالني بكل بساطة